Yaponiya Rusiya ilə sülh müqaviləsi barədə danışıqları davam etdirəcək

yaponiya-rusiya-il-sulh-muqavilsi-bard-danisiqlari-davam-etdirck-03072004

Yaponiya Rusiya ilə sülh müqaviləsi barədə danışıqları davam etdirəcək

Yaponiya hökuməti Rusiya ilə əvvəllər yüksək səviyyədə əldə edilmiş razılaşmalara uyğun olaraq sülh müqaviləsi barədə danışıqları davam etdirəcək.

Bu fikri Yaponiyanın Xarici İşlər naziri Toşimitsu Moteqi iyulun 3-də Tokioda keçirilən mətbuat konfransında söyləyib.

“Sülh müqaviləsi barədə danışıqlara gəlincə, deyə bilərəm ki, bu danışıqlar iki ölkənin hökumətləri səviyyəsində keçirilir. Baş Nazir Şinzo Abe və Prezident Vladimir Putin arasında əldə edilmiş razılaşmaya müvafiq olaraq, biz ərazi mübahisəsinin həllindən sonra sülh müqaviləsinin imzalanmasını nəzərdə tutan başlıca mövqeyimiz əsasında danışıqları təkidlə davam etdirmək niyyətindəyik”, - deyə nazir jurnalistin Rusiya Konstitusiyasına edilən əlavələri şərh etmək barədə sualını cavablandırarkən bildirib.

Qeyd edək ki, Yaponiya ilə Rusiya arasında II Dünya müharibəsindən sonra sülh müqaviləsinin imzalanması barədə danışıqlar ötən əsrin ortalarından davam edir. Müqavilənin imzalanmasına əsas maneə kimi Kuril adalarının cənub hissəsinin mənsubiyyəti göstərilir. 1945-ci ildə bütün arxipelaq müharibənin nəticəsi olaraq keçmiş SSRİ-nin tərkibinə daxil edilib. Lakin Yaponiya tərəfi həmin arxipelaqa daxil olan İturup, Kunaşir, Şikotan və Habomai adalar qrupunu bu ölkənin ayrılmaz tərkib hissəsi hesab edir.

Hibya Xəbər Agentliyi